Самопрегледот може да спаси живот!
И овој октомври традиционално е обоен во розово.
Почнувајќи од 1985 година, десеттиот месец во годината насекаде во светот се посветува на борбата против ракот на дојката кај жените, кој е најчест тип на рак кај женската популација, опфаќајќи дури до 10% од жените во некоја етапа од нивниот живот.
Охрабрувачки е фактот што раната детекција во голем број случаи води кон успешен третман и надминување на болеста. Добрата информираност и редовните прегледи се клучни за ефикасно справување и рана детекција.
Покрај редовни лекарски контроли, еден од начините на кој можеш и самата да детектираш кој било од наведените симптоми е редовниот самопреглед. Постапката за самопреглед е едноставна и за неа е потребно да се издвојат околу 10 минути, барем еднаш во месецот. Сè што е потребно е внимателно да ги следите следните шест чекори:
- Започнете го самопрегледот пред огледало. Кренете ги рацете над главата и погледнете дали има промени во симетријата на градите, позицијата на брадавиците или било какви промени во изгледот и бојата на кожата.
- Истиот преглед повторете го со рацете поставени на колковите.
- Кренете ја едната рака горе и со другата рака, со кружни движења поминете ја површината на градите една по една. Проверете дали има невообичаени испакнатини/вдлабнатини, грутки, промена во квалитетот на кожата или секрети.
- Со врвовите на палецот и показалацеот, проверете ги брадавиците и кожата околу брадавиците. Забележете дали има промени во формата и површината на кожата, невообичаени црвенила или грутки.
- Не испуштајте да ги проверите и периферните делови од под клучната коска до под градите и од градната коска до под пазувите, вклучувајќи ги и нив.
- За крај направете проверка и во лежечка позиција. Кренете ја левата рака над главата, додека со десната рака ја опипувате левата града и просторот наоколу користејќи различни нивоа на притисок.
- Истата постапка повторете ја и на десната страна.
Редовниот самопреглед е првиот чекор кој можете да го направите, се разбира надополнето со редовни прегледи и консултации со стручни лица. Кај повозрасните групи на жени од 40 до 50 години, особено значајни се и редовните мамографи кои се препорачува да се прават еднаш во две години, додека жените над 50 години е потребно да прават мамографија еднаш годишно.
Едуцирајте се за симптомите, делувајте превентивно и не заборавајте дека колку и да е динамично нашето секојдневие, грижата за нашето здравје треба секогаш да биде приоритет!
Самопрегледот може да спаси живот!
Прочитајте повеќе: